عرض مشاركة واحدة
قديم 11-28-2010, 05:56 PM رقم المشاركة : 1
معلومات العضو
مازن الجبالي
عضو برونزي
 
الصورة الرمزية مازن الجبالي
إحصائية العضو






 

مازن الجبالي غير متواجد حالياً

 


افتراضي قصص الحكواتي (متجدد)


السلام عليكم ورحمة الله


اسعد الله اوقاتكم جميعا


وهلحين بدي احكيلكم كصة تحطوها حلكه في ذنيتشن

وبدي الجميع يكراها


يحكى انّ

كان فيه شاب محترم ميسور الحال ؛ وحيد امه وابوه ومدلل من امه بشكل كبير جدا وتحت رعايتها وحنانها وحبها ودلالها عايش في نعيم باسم الله ماشاء الله عليه وعليها


منشان هيك كان عايش لاشغلة ولا عمله ولابفهم بشغلة اصلا اذا بدو يشتغل
ولولا المصاري (الفلوس) اللي بوخذها من امه بالسر من ورا ابوه كان اكل هوا

وبتلاقيه يا بيكسدر مع اصحابه بالشوارع يا نايم ثلاثترباع الليل والنهار ؛ يا كاعد (لا للسدة ولا للهدة) مثل مابحكي المثل
او زي ما بحكوا هلايام (شوفير فرشه)

بيوم اجا عليه ابوه وحكالو : شوف يا ابني ؛ انت كبرت ما شاء الله عليك ولازم تشتغل وتصير تعتمد على حالك ؛ مابنفع هيك ؛ بكرة بنموت وبتصفى مابيظل الك حدا غير نفسك وذراعك وشغلك راس مالك

حكالوا : يابا شو بدي اشتغل ؟ مابعرف اشي ولا تدربت على اشي

ابوه : (بينه وبين حاله) : مهو من همالتك ودلال امك

ابوه : بتتعلم يابا ؛ مافيه بني ادم انولد متعلم ؛ من الصبح بتنزل عالبلد وبتشتغل اي اشي بتقدر عليه ؛ ولاترجع كبل ما تجمع حق ليرة ذهب وتجيبها معك

وفعلا ثاني يوم ولما كان مزبط امور الطلعة وبدو يروح اجت عليه امه واعطته ليرة ذهب وحكتلو غيبلك يمّا يومين ثلاث ؛ تسلى ؛ وتعال اعطي ابوك الليرة ؛ والله ماني عارف ابوك ليش مستعجل على بهدلتك بالشغل ؟ مالحالة ميسورة والحمد لله ؛ خذ يما الليرة بس لاتجيب سيرة لابوك لحسن يذبحني

وفعلا اخذ الليرة وغاب يومين ثلاث ورجع اعطاها لبوه

ابوه مسك الليرة ؛ صار يدقق فيها مزبوط بعينيه ؛ حرك راسه مش مبسوط وحكى : لا ياولدي مش هاي الليرة اللي وصيتك عليها ؛ هاي رح ارميها بالنار هسا ومن بكرة الصبح بتنزل عالمدينة تشتغل وتحصل ليرة ثانية وتيجي

وفعلا قام ورماها بنار الكانون اللي قدامه ؛ ودخل على غرفته ونام ؛ والولد مبحلق فيه وبالنار


ثاني يوم صار نفس الشي وامه اعطته ليرة ذهب ؛ وغاب ورجع اعطاها لابوه
وابوه عمل نفس الشيء ورماها بالنار وحكالو من الصبح بترجع تجيب ليرة غيرها


وثالث يوم ورابع يوم ؛ نفس الموال

الولد عاد زهق وحكى والله لاطلع بنص الليل من دون ما امي تشوفني وادوّر على الليرة اللي بدو اياها ابوي واشوف شو اخرتها

وفعلا طلع من دون مايحكي لامه ولا يوخذ منها اشي

وغاب


غاب


غاب


ييجي شهرين ثلاث


بس لما رجع كان معاه ليرة ذهب فعلا من عرق جبينه

دخل على ابوه (مقربط عليها) يعني ماسك الليرة بايدو بقوة وحرص لحسن تسقط ولا تضيع منه ؛ واعطاها لابوه


ابوه ؛ نفس الشيء برضو ؛ دقق بالليرة بعينيه ؛ وهز راسه مش مبسوط وحكالو : برضو مش نفس الليرة اللي بدي اياها ؛ وقام منشان يرميها بالنار


ابنه عاد ؛ هالمرة ؛ (هاظ) عليه ؛ يعني هجم بسرعة منشان ينقذ الليرة

وحكالوا يابا حرام عليك ؛ 3 اشهر اكلت هوا لحتى دبّرتها وجبتها وهسا بدك ترميها بالنار !!!!


الاب : اها ؛ هيك لعاد ؛ طب ماني عارف قصة الليرات( الاولانيات) منشان هيك رميتهن قدام عينك ؛ بس انت ولاتحركت ولا زعلت على ليرة وحدة فيهن
منشان هيك عرفت انك ماتعبت فيهن
لوتعبت فيهن كان ماخليتني ارميهم بالنار (مثل هسا)

شايف يا ابني قيمة الانجاز !!

وكيف لما تتعب بشغلة مابتهون عليك تخسرها او تضيع بسهولة قدام عينك ؟


شايف كديش كنت انت وامك تصرفوا مصاري من غير حسيب ولارقيب بفايدة و بدون فايدة وكأنها اموال حرام !!!


طبعا مش رح تحسوا فيها ولابخسارتها لانكم ماتعتبتو فيها

بس لو كانت مصاريك انت وتعبان فيها كان ماخليت حدا يبعزقها يمين وشمال بدون فايدة


يا ابني :

الرجل بدون شغل مش رجل ؛ والمصاري اللي مش متعوب عليها سهل تضيع

دايما اعتمد على نفسك مش على غيرك

لانو غيرك مش دايملك ؛ ولادايم غير الله

ولانو برضو مش من حقك تضيّع تعب غيرك وتعيش عالة عليه
حتى لو ابوك وامك ؛ بكرة بيموتو وبتعيش عالة على غيرهم ؛ والله اعلم اذا بتلاقي غيرهم ولا لأ ؛ وحتى لو ما ماتوا ؛ المفروض باخر حياتهم انت تصرف عليهم مش همي اللي يصرفوا عليك !!


يا ابني ؛ من جد وجد ؛ ومن زرع حصد
ومن جاءهُ المال بغير جهد ، هان عليه ضياع هذا المال
يا ابني ؛ قال صلى الله عليه وسلم : ‏‏‏نعمتان مغبون‏ ‏فيهما كثير من الناس الصحة والفراغ
اغتنم شبابك قبل هرمك ، وصحتك قبل سقمك ياولدي



وسلاامه تسلمكم







رد مع اقتباس