سلام عليكم ورحمة الله وبركاتو واللي بجيبتك يا سامعني هاتو
كصتنا اليوم من الكصص الثابتة بالتراث الفلسطيني بسبب ثبوت اسم شخصيتها
اكيد كثير منا سمعنه هاي الكلمه يا نص نصيص
ولا سته نادت عليه هي يا نص نصيص
بس ما رح نحكي عن نص نصيص اليوم * رح نحكي اليوم عن
اقريعون
اعرفكم عليه و عن بلاويه !
على فكرة كصص نص انصيص وقريعون هاي كصص اطفال مش كبار للتنبيه ليس الا
يعني اجدادنا كانوا يحكوها لاطفالهم (كصص ماقبل النوم بتعبيرات اليوم)
منشان هيك بتلاقو فيها تفاصيل فيها مبالغة اوخيال شاطح كثير اشي بتصدّق واشي مابتصدّق طبعا
اقريعون سيداتي انساتي سادتي هو سلطان ابن سلطان * وزينة الشبان في عصره * تعلم الصيد والفروسية وهو صغير فصار معروف باسم : ماهر او السلطان الماهر
طلع بيوم من الايام رحلة صيد وصارو يطاردوا بهالغزلان * وبعد ما خلصت المطاردات * كلهم رجعوا الى نقطة الانطلاق ما عدا السلطان ماهر * فتّشو عليه كثير بس ماهر فصّ ملح وذاب
السلطان الوالد بس دري زعل زعلة مرتبة وخلى جنوده يطلعو يفتشو عليه وحكالهم مايرجعو بدونه
ماهر الله يهدّي باله شاف حاله ضاع كعد جنب مغارة قريبة من نبع مي وولع نار وكعد يتحمّد الله
فجأة سمع صوت جاي من جوّا المغارة * قرّب عليها * واكتشف فرس كاعدة بتولد بالصلاة عالنبي
على طول راح عالنبعة والنار اللي ولّعها وساعد الفرس بالمية السخنة زي مابعملوا بالافلام المصرية
وولدت فعلا وجابت مهر مثل الكمر بالصلاة على محمد
ومن يوميها توالفوا على بعض (يعني صارو صحبة) وظل يهتم بالفرس والمهر لحتى كبر المهر وصار زلمة قصدي حصان اسود بسم الله ماشاء الله عليه
ماتت الفرس بعد فترة فالسلطان ماهر ركب على ظهر الحصان الاسود وطلعو مع بعض برحلة منشان ينسّيه احزانه
وسبحانك ياربي الحصان مشى فيه بطريق العودة لقصر الوالد
طبعا هات يازغاريد وفرحة وحفلات برجوع الغالي
ولان الفرح دايما مابيكمل ماتت ام ماهر الله يرحمها والسلطان (بعد فترة) تزوج وحدة ثانية للاسف كانت حسودة حقودة
وصبت حقدها وغيرتها على ماهر وقررت تتخلص منو باي طريقة
فكّرت * وقررت * وبدأ التنفيذ
عملت حالها مريضة * وبالتنسيق مع الدكتور المرتشي حكا الدكتور ما بيشفيها غير توكل قلب الحصان الاسود
طبعا ماهر يموت ولا يضحي بالحصان الاسود (وهي بتعرف هالحكي)
السلطان الوالد حكا لماهر لازم نذبح الحصان * ماهر حكالو امرك يا بوي بس اسمحلي اركب عليه للمرة الاخيرة توديعة يعني * الوالد حكالو ماشي ولايهمك . ماهر حمل حاله وركب الحصان وطلع من القصر طلعة بنية عدم رجعة
ونجحت خطة مرت ابوه فعلا
انطلق ماهر بالحصان الى مطرح بعيد عن القصر ولما وصل منطقة امنة وقف ونزل يرتاح
الحصان الظاهر توغوش - كما تقول الرواية - حكى لماهر : شو ناوي تعمل هسا ؟
ماهر رد عليه : لا تخاف مش رح ارجع فيك ومش رح اضحي فيك لو بموت
روح انت هسا وتوكل على الله بحال سبيلك وانا برجع لحالي وبدبر حالي مع ابوي
الحصان دمعت عينه من الامتنان لماهر وحكالو خذ خصلات هالشعر منّي
واذا احتجتني بيوم من الايام افركهم بس وماعليك * بتلاقيني طيار جاييلك
رجع ماهر لحاله * وفي الطريق شاف واحد فقير ماشي . حكالو : شو رايك تبدّل اواعيك باواعييه وفوقهم ليرة ذهب ؟
الفقير ماصدق اللي سمعه * وطبعا وافق وبدّل معاه الاواعي
لبس ماهر لبس الفقير ومشى ولقي محل لحّام اشترى منه كرشة عجل * نظفها ونشّفها وزبطها على مقاس راسه ولزقها مثل الباروكة بس باروكة صلعة بدون شعر
ومشي فيها : اواعي فقير * وراس اصلع * يعني تنكر من الاخر
وكلما مر على ناس ينادوه يا اقريعون ويا اقريعون لحتى لزّق اللقب فيه
ومحدا عارف انه ابن سلطان
سافر اقريعون وراح واجا وبالاخر وصلت فيه يشتغل (بستنجي) في قصر احد سلاطين البلاد
بنت هذا السلطان كانت بيوم من الايام وبدون ماتقصد بتكسدر على سطوح القصر شافت اقريعون متخبي بزاوية بين الصخور و بيتحمم
طبعا شافت راس اقريعون الاصلية وهالشعر الاشقر وهالبشرة النواعم اللي ملهاش علاقة ببشرة العمال الفقراء ابدا"
وعرفت انه لابد سر كبير متخبي ورا اقريعون بس ماحكت لحدا شو شافت
ماهر بعد ماتحمم ولبس لبس اقريعون طلع من الحمام الحجري تبعه و(لقط) الاميرة وشافها وحبها من اول نظرة
وبيوم من الايام نادى المنادي :
(((يا اهالي المدينة * على جميع الشبان ان يمرّوا بجانب القصر لان بنات السلطان يرغين باختيار ازواج لهن)))
وبدهم ينقّوا ويستحلوا
وفعلا دشعو الشباب * والسلطان حكى للبنات الشب اللي بيعجبكم زتّو عليه وردة منشان نعرف مين هو ونجيبه
الاميرة على طول زتّت وردة على قرعة قريعون
السلطان حكالها : متاكدي من الهدف ولك ؟ ليكون قصدتي اللي جنبو ؟
حكت لا متاكدة ومصرة عليه
السلطان طبعا انجن جنونه وحكا لقريعون اذا بدك ماتموت اطلع من هالبلد قبل ما اقص رقبتك
اقريعون حكالو ولا يهمك طالع بس امهلني يومين ثلاث ارتب امور السفر
ومن اول ليلة الاميرة ارسلت خادمتها لقريعون ومعاها لبس حريم وحكتلو البس هاي الاواعي وتعال معي عالقصر الاميرة بدها تخبيك عن عيون السلطان وجنوده
وفعلا لبس الاواعي وراح على الاميرة وخبذته بغرفة مهجورة بسراديب القصر وظلت تتطلطل عليه كل فترة وفترة لحتى ييجي فرج الله
وبيوم اجت عليه مفزوعة وحكتلو بلادنا بتتعرض لغزو حرامية وسرسرية الله وكيلك والظاهر رح تسقط البلد تحت ايديهم
حكالها اقريعون : ما فشروووو
هسا بورجيكي فيهم
ويفرك خصلات شعر الحصان
وييجي الحصان ويحكيلو شبيك لبيك
حكالوا فيه غزاة بدي تساعدني اردّهم عن البلد واهزمهم
حكالو ولا يهمك امسك سيفك واركب على ظهري ورح تشوف العجب من المعركة
وفعلا كان ماهر يقاتل بقوة 100 فارس فوق الحصان الاسود
والحرامية سقطوا مثل الذبان في مواجهة البف باف
انجرحت ايد ماهر بالمعركة بس كسب كل الجولات ماشاء الله وانهزم الاعادي
السلطان طبعا انبهر بهذا الفارس المجهول وحكالوا مين انت ؟
طبعا اقريعون كان لابس لبس الجنود + طاقية الحديد (الخوذة) ومش مبين ملامحه
طلب اقريعون من السلطان منديله منشان يربط الجرح * واستاذن يداوي حاله ويرجع يحكي للسلطان القصة
وغاب اقريعون والكل جايب بسيرته ويقول الفارس الذي انقذ المدينة
لحتى اجت الاميرة على ابوها وحكتله : بدك تعرف مين هذا الفارس تعالي معي
وراحت على غرفة اقريعون بسراديب القصر وشاف السلطان اقريعون وايده المجروحة ومربوطة بمنديله وعرف القصة (من بنته) كلها من طق طق لسلام عليكم
طبعا عفى السلطان عن اقريعون واعتذرلوا (بعد ماعرف كمان انه ابن سلطان) وجوّزه بنته
ومرت ابوه لماهر دريت بالخبر وانتحرت من القهر
وتوتة توتة خلصت الحتوتة
نلتقي ان شاء الله مع قصة !!!!
ويسعد مساكم جميعا