ألسلام عليكم ورحمة الله وبركاته
الله يمسيكم بجميع انواع الخيرات وهداة البال والحسنات
ولسان سادك مايعرف زلّلات
كصتنا اليوم عبارة عن :
خرفيّة اولها تشذب واخرها تشذب (كذب)
يحكى انّ
كان يا ماكان فيه صياد فقير وعلى باب الله كل يوم يروح يتصيد على شط البحر ويبيع ويوكل سمك وعلى هالحالي يا خالي
وبيوم من الايام وهو كاعد على صخرة ورامي السنارة وجاعص والا يشوف ثلاث طيور كبيرة يهدّين بمنطقة كريبة من الصخرة * واحد من هالطيور شلح الريش تبعه والا هي كاينة بنت زي الكمر(القمر) قعدت تكسدر عالشط ونزلت للبحر تتشمس الحلوة وبعدين دخلت عالميّ تسبح
صاحبنا ترك السنارة وراح على منطقة الطيور * والطيور شافته وهربن * راح وحرق ريش الطير (البنت الكمر) اللي في الميّة
ووقف بعيد يراقب تقول مخرج برنامج صادوه
طلعت البنت القمر من البحر اول شيء مالقيت زملاءها الطيور * وثاني شيء مالقيت ريشها * وعلى طول صارت تلطم وتعيّط
صاحبنا الثاني على طول دشع ورمى عليها عباته وستر عليها وحكالها جيتي والله جابك * يلا روحي معي واتجوزها على سنة الله ورسوله وصارت ست بيت وهو يسرح عالصيد كل يوم كالعادة
وبيوم طلبت من جوزها تطلع تكسدر وتشم هوا البحر زهقت المسكينة من خنقة البيت وبدها تتنفس حكالها ماعندي مشكلة بس لاتطوّلي
لبست وتهندزت وطلعت تقول ملاك وماشي عالارض صلاة النبي ماحلاها * شافها ابن السلطان * ونزلت ريالته عليها
رجع عالقصر وحكى لامه : قيمي فراش الهنا وحطي فراش العزى !
قالت له امه : من غير شر عنك يما شوفيه ؟ شو صاير ؟ شو السيرة ؟؟
حكالها هيك هيك القصة * حكتلو يم يمّا ملقيتش غير هذي ؟ هذي مرة متجوزة يما
حكالها ان عكلي خزك اذا ما اخذتها رح اموت
حكتله : مابكونش امك ومرت السلطان ان ما جبتها خدامة تحت اجريك * مش بس تتجوزها
راحت مرت السلطان لجوزها (والظاهر كاينة حاكميته ) قالت له * فيه هالمرة الفلانية متجوزة * بس ابنك بدو اياها واذا ما اخذها ابصر شو بيصير فيه ويمكن يروح فيها
قالها يامرة اتقي الله مش بتكولي متجوزة !!!
حكتله ايوة بس انا مابستغني عن ابني * وبدك تدبرنا
شو بدكم بطولة والقصيره اقنعته للسلطان انه يدبر مصيبة للصياد منشان يستفردوا بمرته
السلطان قال نادولي الصياد
اجى الصياد
حكاله : بدك تعمللي بساط شقفة وحدة وطوله من هون للبحر * خذ هالالف ليرة حق البساط*ومعك يومين تخلصه يا امّا بقطع راسك
الصياد طبعا روح عالبيت مش شايف الفظى
سالته مرته شومالك حكالها قصة المصيبة اللي نزلت على راسه ونفسه بس يفهم ليش السلطان اختاره من بين خلق الله كلهم !
وحكالها : شو رايك هاي معنا الف ليرة خلينا نحمل حالنا ونهج من هالبلد
حكتلو لا بدنا نرحل ولا عيالنا
روح عند اختي بالمغارة الفلانية ع شط البحر واحكيلها بتسلم عليكي اختك وبتقوللك اعطينا المغزل اللي عندك
ركاظ راح عالمغارة وجاب المغزل * ومرته علمته كيف يشتغل عليه وراح لعند السلطان وعمله بساط طويل عريض في لحظات كليله وحكاله : اذا حابب تفرش الصحرا موكيت ناديني بس وماعليك
الناس اتعجبت
وابن السلطان مرض
مرت السلطان راحت لجوزها وحكتلو بدك تدبرنا مرة ثانية * حكالها ياولية اتقي الله خلص
حكتلو اسمع علي تاقولك : اطلب من الصياد يجيب لك ولد عمره اسبوع يخرفنا خرفية اولها تشذب واخرها تشذب
السلطان قالها يا ولية اتقي الله مش لهالدرجة * حكتلو انت بس اعمل مثل ما قلتللك واذا عجزنا كمان هالمرة بوعدك ما افاتحك بالموضوع مرة ثانية خلص
نادى السلطان عالصياد وحكالو بدك تجيبلنا ولد عمره اسبوع يخرفنا خرفية اولها تشذب واخرها تشذب ومعك يومين والا رح اقطع راسك
الصياد روح عالبيت مش شايف الفظى مرة ثانية المسكين وحكى لمرتو : انا بدي اهج من البلد * حابة تيجي معي ؟
قالتله شو فيه ؟ حكالها شو طلب السلطان منه
صارت تظحتش (تضحك) * حكالها : واخرى كمان بتظحتشي ؟؟
حكتلو ولا يهمك
خذ المغزل وروح رجعه لدار اختي طوّلنا عليهم واحكيلها بتسلم عليكي اختك وبتحكيلك ممكن تسلفينا ابنك اللي ولدتيه جديد
لمدة ليلة وحدة بس ؟ وجيب الولد وتعال
وفعلا راح الصياد ودّى المغزل وجاب الولد وراح فيه عالقصر على طول
كل الناس في القصر اندهشت وصارو يحكو : الصياد بيتهبل علينا ولا شو القصة ؟
وهمّي مندهشين والا الولد يحكي : يا جماعة وين السلطان ؟ خلصونا
دشع السلطان مسرع وهو مش مصدق ذنيه
الولد حكى :
شوف يا سيدي السلطان انت طلبت تسمع كصة اولها تشذب واخرها تشذب وانا جيت احكيلك اياها * واستغفر الله العظيم
قبل ما اكذب رح احكيلك * اني انا لما كنت شب قلت بيوم بدي اطلع اتنزه * تحزمت بسور المدينة واخذت الميذنة وحطيتها سكين على جنبي وقلت يا باب الله الكريم
مرّيت على هالزلمة على باب الله في الصحرا بيبيع بطيخ * واقف المسكين بهالصحرا والدنيا بتمطر وهو بنادي : بطيخ بطيخ
شريت هالبطيخة وتناولت الميذنة بدي اشقح فيها البطيخة فلتت مني الميذنة بقلب البطيخة واتدحرجت * شمرت ولحقتها * والا هالمدينة بتطبل وبتزمر وهالسوق مليان بياعين * ظليت امشي من حدّها لردّها والا هالديك حامل الميذنة بمنقاره * ركظت وراه
اخذتها منه وظربته بالميذنه وطلعت له دبّره على ظهره * قلت حرام يا ولد داويه
مرقت على العطار واعطاني حبة جوز وحكالي ادقها وارشها على الدبّرة * وسويت زي ماحكالي
وما خلصت الا وشجرة جوز تنبت على ظهر الديك * وبسرعة كبرت وكبرت لحتى وصلت السما
قلت فرصة اطلع عليها واستطلع السما عن قرب
وظليت اطلع اطلع اطلع تاوصلت اخرها
والا هالسهل على مد العين ومليان ناس بتحرث وبتدرس القمح والسمسم
وقفت جنب حراث بيلقط سمسم * وشفتلك نملتين يشدّين بحبة سمسم
هذي تشد من هون وهذي تشد من هون لحتى انفلقت حبة السمسم نصين
وهي انفلقت من هون ونهر من زيت السيرج يسيل منها * والله لولاني نطيت بالسفينة والا سيل الزيت بدو يجرفني
وظليت بهالسفينة داير لحتى وصلت عندكم وجابني هالصياد على قصركم الكريم
صرخ ابن السلطان : يقصف عمرك شو كذاب
قال الولد : والله ان كان عالكذب انتو اللي طلبتو الكذب . وانت بالكذب برضو بدك توخذ مرت واحد فقير ظلم يلي ماتخاف الله
الناس انخرست من هول المفاجأة * مفاجأة الولد اللي بحكي ومفاجأة نوايا ابن السلطان اللي كشفها الولد
السلطان صرخ وحكى قيمو هالولد من هان * قاموه وروحت الناس وروح الصياد على مرته والناس تحكي اللي الله معاه كل الناس معاه
وابن السلطان طق ومات من القهر
والصياد هج من البلد على وساع الوقت
وتوتة توتة خلصت الحتوتة
ولنا لقاء اخر ان شاء الله