اغاني اطفال فلسطين زمان

[مازن الجبالي]

جيبتلكن اليوم اغاني كتير حلوة كانو يغنوها اطفال فلسطين وما زالو يغنوها


يا رايح على الشجرة
جبلي معك بقرة
حلابة العشرة
تحلب وتسقيني
يا رب تنجيني
انظروا انظروا يا ولاد
ربانا شيخ الشباب
اللي عيون سود سود
مكحلات براس العود
....................

حدوته بدوته ،،،،،،،،، طلع الشيخ ع التوته
والتوته بدها فاسة ،،،،،،،، والفاسه عند الحداد
والحداد بدو بيضه ،،،،،،، والبيضه عند الجاجة
والجاجة بدها علفة ،،،،، والعلفة بالطاحونة
والطاحونة مسكرة ،،،،، فيها مية معكرة
...............

حطو مقص على مقص ،،،، سبع عرايس تنزف
حطوا منخل على منخل ،،،، سبع عرايس تدخل
اشتي وزيدي ،،،،،، بيتنا حديدي
عمنا عبدلله ،،،،،،،، رزقنا ع الله
شمست شميسة ،،،،،،،،، على قرعة عيشة
عيشة بالمغارة ،،،،، جابت قطه وفارة
ضربته ع تمه ،،،،،،، راح يعيط لامه
فتت له فطيرة ،،،،،،، ع قد الحصيرة

................


يا فاطمة ،،،،،،،،،،، يا عونك
وين الجمل ،،،،،،،،،، بالقنطرة
شو ياكل ،،،،،،،،،، حب الذرة
شو يشرب،،،،،،،،، قطر الندى
هالباب يفتح ،،،،، ما يفتح
هالباب يفتح ،،،،،، ما يفتح
هالباب يفتح ،،،،، يفتح ، يغلق
ليلة عرسك ،،،،يا فلان
لا كرشة ولا مصران


ومن الاغاني الي بغنوها الاولاد في فلسطين اغاني عن الاحتفالات والعيد






شتي يا دنيا وزيدي،،،،، بيتنا حديدي
عمنا عبد الله ،،،، رزقنا ع الله
شمسي يا شميسة ،،،، ع عروق عيشة
عيشة بنت البابا ،،،،، بتلعب ع الشبابة
يا قمرنا يا جدع ،،، يا اللي مشنشل بالودع
بناتك ستة سبعة ،،،، بلعبن على القبعة

[مازن الجبالي]

وهاي تهليله للطفل قبل النوم



نيمتك في العلية ،،،،،،، خوفي عليك من الحية
تعاليله يا بدرية ،،،، بلكن على صوتك ينام
نيمتك بالمرجوحة ،،،، خوفي عليك من الشوحة
تعاليله يا غندورة ،،، بلكن على صوتك بنام



.................

أو نني نني


هذا الاصطلاح أو نني يستعمل كثيرا عند تنويم الطفل
وكلمة نن ليست عربية بل ايطاليه ورومانية لها نفس المدلول الذي نستعمله في اثناء تنويم
الطفل




حدريجه بدريجه ،،،،، من حيها لبيها
قالت لي معلمتي ،،،، جيبي زيت وبصل
وقع الكوز وانكسر ،،،، حلفتني معلمتي
لتعلقني بالشجر ،،،،، والشجر مليان عروق
خبي إجرك يا ،،،،،، منيح يا عروس
يا أم الحلق ،،،،، والدبوس


........................


يا مفطر بعد العيد ،،،،، حني اسعد وسعيد
حني عليه الالماني ،،،، خلي اسنانه قدامي
بكرة العيد وبنعيد ،،،،، بنذبح بقرة السيد
والسيد ماله بقرة ،،،،، بنذبح بنته الشقرة
والشقرا ما فيها دم ،،،، غير نذبح بنت العم
بكره العيد يا مسعود ،،، دارت المية في العود
يا سعيد ويا سعيد ،،، اليوم الوقفة بكره العيد
بكره العيد من حقه ،،،، بنقطع راسك يا سقا
بكره العيد والثاني ،،،، بنقطع راس ابو هاني
بكره العيد والثالث ،،،، بنقطع راس ابو عايد

................................................

من اغاني المقاومة ،،
أنا طفلة عربية ،،،، بحارب مع الفدائية
أنا عمري ثلاث سنين ،،،، قلبي صوان متين
ما بحمل فرد فلين ،،،، وبرمي قنابل يدوية
أنا عمري ما بخاف ،،،،، ولا نتخبا تحت لحاف
والصهاينة قبالي ضعاف ،،،وبكفي اني عربية


...............

طيري وهدي ،،،،،، يا وزة
ع بلاد غزة ،،،، يا وزة
قطف العنب ،،،، بالسلة
مقطوف مقطوف ،،،آمنة
يا معطارتي ،،،،، آمنة
دقت الكبة ،،،،،،، آمنة
انزلت على الشركة البركة
يا خالو
لقيت خواتي الستة
يا خالو
لقيت مندوب الازعر
يا خالو
عما يمشي او بتكعور
يا خالوا

[بتول القدس]

رحم الله تلك الايام ---يا ريت اولادنا يعرفوا ولو القليل
ايامنا ما كان لا انترنت ولا حتي قنوات --عنا عايشين بسلام
هاي ضريبه التطور ---مشكور

[مازن الجبالي]

اقتباس : المشاركة الأصلية كتبت بواسطة بتول القدس [ مشاهدة المشاركة ]

رحم الله تلك الايام ---يا ريت اولادنا يعرفوا ولو القليل ايامنا ما كان لا انترنت ولا حتي قنوات --عنا عايشين بسلام هاي ضريبه التطور ---مشكور

ساق الله على هذيك الايام كانت كلها براءه وطيبة نفس
شكرا لمرورك اخت بتول القدس
تحياتي

[نسيم الوادي]